Гæбæраты бинонтæ æмæ сæ хæдзарад
Гæбæраты Авто æмæ йæ цардæмбал Этери Кировыхъæумæ æрцыдысты 17 азы размæ. Хъæуы советы уынаффæмæ гæсгæ сын лæвæрд æрцыд зæххы хай. Бинонты хистæр йæ дыууæ фыртимæ бавнæлдтой хæдзар аразынмæ… Гыццылгай сæ царды фадæттæ хуыздæрæй хуыздæр кодтой. Этери та сæ æртæ чызгимæ кодтой цæхæрадоны куыст.
— Куы ‘рцыдыстæм ардæм, уæд дзы ницы уыдис, зæхх хæмпæл-гæрдæг æмæ амброзийæ нæ зынди, — зæгъынц Авто æмæ Этери.
… Абон Гæбæраты цæхæрадон æмæ дыргъдон нымад сты хуыздæртыл. Бонæй-бон хуыздæр æмæ хъæздыгдæр кодта сæ зæххы хай. Пъамидортæ цалдæр хуызы, судзаг цывзы, картоф, джитъри, зын зæгъæн у, цы сæм нæй, уый.
Авто йæ лæппутимæ, скодта ссæдзæй фылдæр хъæрмуæттæ, уым рæзын кæнынц садзæнтæ. Бинонтæ иумæ рацæуынц цæхæрадонмæ æмæ зæрдæрухсæй фæкусынц.
— Кæй зæгъын æй хъæуы, къухфæллой дзы бирæ ис, — зæгъы хæдзары хистæр, — фæлæ æнæ кусгæ дæр а дунейы ницы ис.
Гæбæратæ сæ зæххы алы гæппæлæн дæр аргъ кæнынц æмæ дзы байтауынц алыхуызон халсартæ æмæ дыргътæ, уæй кæнынмæ дзы аласынц æрыдоны æмæ Дзæуджыхъæуы базартæм. Бинонтæн уый у сæ иунæг æфтиаджы гуырæн. Авто æмæ Этери æлхæнгæ ницы кæнынц. Сæ хæдзарад у хъæздыг, канд халсартæ сæм нæй, фæлæ ма алыхуызон дыргъ бæлæстæ: фæткъуытæ, кæрдотæ, бал, цым, æхсæртæ, алтъамитæ, мæнæргъыйы къудзитæ, æрыскъæф, сæyæфсир…
Уымæй уæлдай ма дарынц фос, кæцыйы руаджы сæ хæдзары кæддæриддæр вæййы æхсыр, цыхт, царв, дзидза.
— Алы куыст дæр кæнын хъæуы зæрдиагæй æмæ уæнгрогæй, — афтæ нымайы хæдзары æфсин.
Уый тыххæй сæ хæдзарад вæййы бæркадджын æмæ иттæг зылд.
Гæбæратæн сæ кæстæртæ дæр сты æгъдауджын, куыстуарзаг. Бинонтæ сты æнувыд кæрæдзиуыл. Зонынц — куыстæн йæ бын сындз кæй у, йæ сæр та — мыд. Алцыдæр кæнынц афойнадыл.
Иуныхасæй, ахæм фæллойуарзаг бинонтæн тас ницæмæй у, уæлдайдæр та гъеныр цы экономикой кризисы кой кæнынц, уымæй.
Цъæритты Аланæ.
æрыдоны муниципалон районы газет “Рухс”, №48 (10218), 2009 азы 5 май.